- Back to Home »
- Atbaf Abrak , Best Urdu Poetry , Best Urdu Poetry، Urdu Font »
- صدیاں لگیں انسان کو جس علم کی خاطر..... اتباف ابرک
Saturday, September 23, 2017
صدیاں لگیں انسان کو جس علم کی خاطر
دو وقت کی روٹی نے وہ پھر چھین لیا ہے
اپنی تھی دہائی کہ ہوا گھر میں اندھیرا
ایسی ہوئی شنوائی کہ گھر چھین لیا ہے
صدیوں کی مشقت نے جو سایہ تھا خریدا
اس دور نے ہم سے وہ شجر چھین لیا ہے
کہتے ہیں کہ جینا ہے تو جنگل کو ہی چلئے
انسان سے حیواں نے نگر چھین لیا ہے
تھا حکمِ خدا ظلم میں کر جاوں میں ہجرت
تہذیب کے زنداں نے سفر چھین لیا ہے
ہر شے میں نظر آتی ہے اب ایک سیاہی
اس رات نے رنگوں کا ہنر چھین لیا ہے
ابرک یہ شکایت نہیں بس رب سے ہے فریاد
کاہے مری دعاوں سے اثر چھین لیا ہے
اتباف ابرک